Kamagong Road wala atimana

CEBU, Philippines -  Wala na g’yud tiwasa paghawan sa kagamhanan sa dakbayan sa Sugbo ang karsada sa Sitio Kamagong, sakop sa Barangay Lahug nga kalaktoran unta pag-agi niadtong mga sakyanan nga gikan sa Lahug ug mopaingon sa Cebu Business Park.

Ang mao nga karsada gihawanan sa mga sakop sa kanhi Squatters Prevention Encroachment Elimination Division (SPEED) atol nga ang mayor mao pa si Tomas Osmeña apan wala na kini padayona sa termino ni Mayor Michael Rama. Daghang mga motorista mitug-an sa Banat Manobela nga samtang laktod unta agian diha ang Kamagong Road apan kuyawan sila tungod kay dunay mga bata nga anha sa karsada magduwa, ilabi na panahon sa gabii.

Mga balay nga gitukod sa karsada gipangguba kaniadto sa mga sakop sa demolition team sa City Hall apan wala pataga  ang dapit nga gigub-an sa kabalayan mao nga dili gihapon kini maagian og sakyanan.

Kun ang Kamagong Road aspaltohon sa City Hall daghang mga motorista nga anha na molaktod sa pag-agi gikan sa Lahug paingon sa Cebu Business Park.

Adunay awhag nga unta ang mga sakyanan nga gikan sa Cebu Business Park ug mosubay sa Escario katugotan unta nga makaliko sa tuo subay sa Kamagong Road paingon sa dapit sa Lahug Elementary School. Sa ingon nga paagi, mamenus-menosan ang mga sakyanan nga motuyo lang g’yud pag-agi sa Gorordo Avenue gikan sa Cebu Business Park (RUB) (BANAT NEWS)