Opisyal namusil sa bar

CEBU, Philippines - Usa ka waiter sa Lotus Restobar sa Tamiya Barangay Basak ang gipusil patay samtang ang bouncer nakaangkon og samad pinusilan sa tiyan human gipangtionan og armas sa usa ka hubog nga polis opisyal sa Lapu-Lapu City Police Office kagahapon sa kaadlawon.

Sumala pa ni Police Officer Three Luisito Ernie, imbestigador sa Homicide Section sa LCPO, ang suspetsado mao si Inspector Rogelio Amoroso nga nadestino sa Operations Section sa LCPO Headquarters. Ang namatay mao si John Stephen Lagsanay,18, residente sa Barangay Maribago lumad nga taga Bohol ug ang bouncer nga si Archie Gesta, 35,nagpuyo sa Barangay Basak sa mao gihapong siyudad.

Matud sa inisyal nga imbestigasyon, si Amoroso planong mosulod unta sa restobar apan gibabagan siya sa bouncer nga si Gesta ug giingnan nga i-deposit ang iyang armas una mosulod sa diskohan apan nasangko kini sa panaglalis.

Human sa argumento nakit-an nga mibalik sa iyang sakyanan si Amoroso apan mibalik ug gidiretso pagpusil sa tiyan si Gesta ug gisunod pagpusil si Lagsanay nga naigo sa liog ug nilusot sa iyahang ulo ang bala.

Apan sa pamahayag ni Amoroso ngadto sa mga sakop sa media human siya nadakpan, miangkon kini nga nakainom kuyog sa iyahang tulo ka amigong pulis ug duha ka higalang sibilyan.

Sulod sa restobar, si Amoroso nagkanayon nga nasaghiran ang iyahang bukton sa usa ka waiter ug iyaha kining gibadlong apan misumbong si Lagsanay sa bouncer nga si Gesta.

Si Amoroso midugang nga basin nagtuo ang waiter nga nasuko siya kay gidako niya ang iyahang tingog kay saba ang diskohan.

Matud pang Amoroso, gibalian siya sa bouncer ug gi-headlock ug ang waiter  misumbag kaniya duha ka higayon. Tungod niini, mibalik siya sa sakyanan ug gipusil ang duha.

Human sa pagpamusil, si Amoroso milakaw padung sa siyudad sa Mandaue ug miadto sa balay ni Superintendent Rodulfo Albotra, ang hepe sa Provincial Intelligence Branch aron  mo-surrender.

Si Superintendent Jonathan Abella, Deputy City Director for Administration sa LCPO nagkanayon nga ang Lotus Restobar, adunay CCTV ug dinhi nila tan-awon kung unsa gyud ang tinuod nga  nahitabo niadtong orasa. Nakita sa crime scene ang tulo ka empty shell gikan sa gituohang .9mm nga bala, usa ka dud nga bala ug usa ka metal jacket.

Nalandig na sa Vicente Sotto Memorial Medical Center si Gesta apan dead on arrival ang waiter nga si Lagsanay sa Mactan Doctors Hospital.

Si Abella nagkanayon nga pasakaan og kasong Homicide ug Frustrated Homicide si Amoroso. (Christell Fatima Tudtud/EIM)(BANAT NEWS)