42-anyos patay sa kilat

CEBU, Philippines - Patay na nga nakita sa iyang anak ang iyang 42-anyos nga inahan human nga kini gikatahong naigo og kilat diha sa Sitio Lamacan, Babag ning dakbayan, kagahapon sa kaadlawon. Ang naigo sa kilat naila nga si Angelita Jacaban Mabini,nagpuyo sa maong lugar ug usa ka mag-uuma.

Matud pa ni PO1 Michael Angelo Singson sa Homicide Section sa Cebu City Police Office nga nahinabi sa Banat News, katapusang nakit-an nga buhi si Mabini niadtong Huwebes sa hapon sa iyang bulakan bisan nagbunok ang ulan ug nagpangilat.

Apan nahibulong sila nga nagbuntag na lang wala na mouli si Mabini hinungdan nga gisubay kini sa mga anak ug nakita siya nga patay na ilawom sa usa ka kahoy.

Gibutyag ni Singson nga duna’y mga paso sa lawas ug nagisi -gisi ang sinina niini. Samtang ang punoan sa kahoy nga iyang gipasilongan nabali  ang mga sanga nga gituohang naigo sa kilat.

Girekomendar nga sa kapulisan nga ipa- autopsy ang patay nga lawas ni Mabini aron matino ang hinungdan sa iyang kamatayon. (Jojo C. Ugdol/EIM)(BANAT NEWS)