Demolisyon sa Galaxy gipadayon

CEBU, Philippines - Wala mapugngi sa mga residente sa sitio Galaxy, barangay Maguikay, dakbayan sa Mandaue ang demolisyon sa mga panimaye kagahapon sa buntag.

Kini bisan gihilakan pa sa ubang residente apan wala gyud paminawa ang ilang mga rason hinungdan nga mitumaw ang panaglalis tali sa sheriff nga si Julbert Opada.

Ang demolisyon gisugdan niadtong Miyerkules apan wala matiwas human dunay mga molupyo nga nagdumili sa pagpahawa sa ilang panimalay.

Sigun pa ni Opada nga ang maong luna gipanag-iya sa kompanya nga Profoods kinsa  midaug sa gipasakang ejectment case sa korte.

Mitumaw ang tensiyon sa lugar dihang miabot ang demolition team ug kapolisan apan ang mga molupyo wala usab magpauwahi human mihimo og barikada.

Gihangyo sa mga apektadong residente nga lugwayan ang ilang pagpuyo gumikan sa ilang sitwasyon nga ilang gihulagway nga dili makatarunganon tungod kay wa sila hatagi og higayon nga makapangandam.

Ang kapolisan nagbantay sa kahapsay ug kalinaw samtang padayon ang demolisyon. (BANAT NEWS)