Gas station sa Talamban gitulis
CEBU, Philippines - Gitulis ang usa ka gasoline station sa Talamban, dakbayan sa Sugbo sa duha ka tulisan nga sakay sa usa ka motorsiklo alas 12:40 kagahapon sa kadlawon.
Wala nakalihok ang guwardiya sa Petron Gas Station nga si Abeso Corredo, 22, dihang gitionan og revolver sa usa sa mga tulisan nga nagpatuong customer ug namulong nga, “chief ayaw og lihok ambi na imong armas para wala’y mahitabo nimo’ng dautan.”
Gikuha sa mga tulisan ang service firearm sa guwardiya nga usa ka shotgun nga duna’y lima ka bala ug gisunod sa pag-adto sa mga tulisan ang cashier’s room diin nakuha ang dili mominus P18 mil dayon sibat.
Ang hepe sa Talamban Police nga si Sr. Insp. Bienvenido Miral nga nahinabi sa Banat News mibutyag nga hangtud karon ila pa nga gipaabot ang tag-iya sa maong gas station aron ilang malantaw ang kuha sa CCTV sa maong establisemento aron pag-ila sa mga tulisan.
Duda si Miral nga dili taga Sugbo ang mihimo sa pagpanulis.
Plano ni Miral nga hugtan pa ang pagpatrolya sa kapolisan sa iyang lugar aron malikayan ang subli nga hitabo. (BANAT NEWS)
- Latest
