63 ka polis sa CPPO gi-drug test

CEBU, Philippines - Gipaubos sa kinalit nga drug test ang 63  ka polis nga nagkuha og Criminal Investigation Course sa Cebu Provincial Police Office kagahapon sa buntag.

Hinuon sa 63 ka polis wala’y napositibo samtang duha ang wala naapil sanglit nitambong og hearing sa korte.

Matud ni PO2 Crisdin Lawian sa CPPO nga tumong sa maong drug test mao ang paglimpyo niadtong mga polis nga nalambigit sa ilegal nga drugas.

Gitataw usab ni Lawian nga dili lang kini ang katapusang drug test nga ilang buhaton apan duna pa sa mga umaabot nga adlaw. Nasayran nga makatabang karon sa Criminal Investigation Course ang drug test alang sa detalyado ug dili taphaw nga imbestigasyon sa kaso.

Alang kang PO1 Richie Gilleran sa Consolacion Police nga importante kanila ang drug test lakip na usab ang kurso alang sa trabaho sa usa ka polis. (BANAT NEWS)