Taga HPG gipusil, wa naigo

CEBU, Philippines - Swerte nga wala naigo sa pagpamusil ang usa ka polis nga sakop sa Highway Patrol Group (HPG) samtang luwan sa iyang sakyanan sa may Mabolo, dakbayan sa Sugbo kagahapon sa alas 8 sa buntag.

Si SPO2 Jose Donoso, nadestino sa clearance division sa HPG-7, gikan sa lungsod sa Consolacion ug padulong na untang mo-duty.

Sumala pa ni Donoso nga una na niya’ng nabantayan ang motorsiklo nga ni-overtake kaniya sa dakbayan sa Mandaue ug gisinggitan siya og “kalbo” sa drayber niini.

Pag-abot sa Mabolo, nitupad kaniya ang motorsiklo nga may sakay tulo ka lalaki ug gisinggitan na usab siya og “opaw” dungan ang buto sa armas.

Nabantayan na lang ni Donoso nga buslot na ang bildo sa passenger side sa iyang sakyanan hinungdan nga  naalarma   siya ug nangayo og tabang sa Mabolo Police.

Wala’y gidudahan si Donoso nga tawo sanglit matud pa wala siya’y kontra sa iyang trabaho ug sa ilang lugar.

“Ang ako siguro’ng gupit ang iyang gikasuyaan kay nagpakalbo man gud ko,” matud ni Donoso.

Wala’y plate number ang motorsiklo nga kolor itom samtang nagpurong lang sa ulo ang sakay niini ug wala’y helmet.

Samtang ang hepe sa City Intelligence Branch sa Cebu City Police Office, Supt. Romeo Santander, nadismaya sa maong hitabo.

Matud ni Santander nga sayop ang gihimo sa mga lalaki kung triping lang ang tuyo niini.

Mipasalig si Santander nga ilang tabangan si Donoso sa pag-ila sa mga responsable sa hitabo. (BANAT NEWS)