Amendments sa C.O.1498 gisupak sa CCPC-Cemla

CEBU, Philippines - Ang mga sakop sa Cebu Citizen’s Press Council ug Cebu Media Legal Aid  mipasar og resolusyon nga nagpadayag og pagsupak sa planong pag-amendar sa City Ordinance 1408 o mas naila nga Anti-Indecency Ordinance sa siyudad sa Sugbo. Si Konsehal Leah Japson maoy misugyot nga amendahon ang maong ordinansa nga gihulagway usab sa Committee on Laws, Ordinances, Public Accountability and Good Government report niadtong Agosto  20, 2014 nga sakop pa sa gahom sa Konseho.

Ang CCPC wa makauyon sa planong kausaban sa maong ordinansa nga naglakip sa paghatag og gahom sa City Anti-Indecency Board (CAIB) nga mag-inspeksyon ug moimbestigar sa mga establisamento nga nagbaligya og mga basahon ug uban pa.

Kinahanglan nga mosanong ang mga tagdumala, tag-iya, o ba kaha promoter niini sa gusto sa CAIB bisan walay mando sa korte bisan unsang orasa.  Ang CAIB na usab maoy magbuot kung unsay matawag nga malaw-ay aron kompiskahon  ug gamitong ebidensya.

Ang CCPC ug Cemla misupak niini tungod kay nakalapas kini sa Supreme Court Guidelines. Usa ka public hearing sa maong ordinansa ang gitakda karong Oktubre 8, 2014.

Ang CCPC migamit nga sanglitanan sa Supreme Court Decision penetsahan og Oktubre 5,1989 (Pita vs. Court of Appeals    SCRA 362) nga nag-ingon nga bugtong ang korte ra maoy moingon kung malaw-ay ang usa ka basahon, kung walay kamandoan gikan sa korte makasupak sa balaod ang mosakmit niini.

Sumala pa sa CCPC ug Cemla, ang mga basahon “perishable items” kon dali rang madaot, kung sakmiton kini bisan wala pa madeklarar sa korte kun malaw-ay o dili , maalkanse niini ang mga magpapatigayon.

Sumala pa ni Atty. Elias Espinosa usa sa mga sakop sa Cebu Media Legal Aid (Cemla) misuporta ang CCPC sa kampanya kontra pornograpiya ug malaw-ay nga basahon basta dili matumban ang kagawasan sa uban ug kagawasan sa pagpadayag.

Si Bise Mayor Edgardo Labella, kinsa maoy presiding officer sa Konseho sa dakbayan sa Sugbo mitambong sa panagtigom kagahapon nagdumili paglaban ni bisan kinsang habig.

 Apan giklaro niya, isip kanhi deputy Ombudsman kaniadto sa Visayas, ang tanang ordinansa, balaudnon ug mga patakaran kinahanglang nahasubay sa Konstitusyon, walay kapuslanan ang bisan unsang mga balaod kung kini nakalapas nang daan sa Konstitusyon. (BANAT NEWS)