Gibuwagan nagbitik sa liog
CEBU, Philippines - Usa ka 22- anyos nga lalaki nga giingong gibuwagan sa iyang uyab ang naghikog sulod sa kasilyas sa ilang balay diha sa Villa Leyson Subdivision, Barangay Bacayan, Cebu City, alas-12 sa udto adlaw nga Martes.
Ang nagpakamatay naila nga si Francis Emmanuel Aberion, 3rd year college student sa kurso nga Marine Transportation.
Matud pa sa imbestigasyon sa Homicide Section sa Cebu City Police Office nga gipangulohan ni SPO4 Rey Cuyos ang apohan niini nga si Efipania Galeos maoy nakakaplag sa maong tinun-an nga nagbitay ug wa nay kinabuhi.
Sulod sa kasilyas naghikot og pisi si Aberion sa iyang liog ug gibaat sa kahoy sa ibabaw niini.
Matud pa nga nahibulong ang apohan nganong dugay migawas sa kasilyas ang apo ug wala kini motubag dihang gituktok ug gisampit.
Tungod niini iyang gilili ang kasilyas ug nakurat siya nga nagbitay na ang apo, gisuwayan unta niya kini og tangtang apan wala na kini magginhawa pa.
Gitug-an sa apohan nga bag-o pa lang mitug-an kaniya ang apo nga gibulagan kini sa uyab. Walay nakita nga foul play ang kapulisan sa kamatayon ni Aberion. (BANAT NEWS)
- Latest
