6-anyos negatibo sa meningo
CEBU, Philippines - Laboratory test sa 6-anyos nga batang gidudahang namatay sa meningococcemia gikan sa lungsod sa Asturias migawas nga negatibo.
Gitug-an ni Provincial Health Officer Dr. Cynthia Genosolango nga sa pakisusi nga gihimo sa Vicente Sotto Memorial Medical Center sa dugo ug cerebrospinal fluid sa bata, negatibo kini sa kagaw nga nagdala sa meningococcemia.
Niadtong Sabado, namatay ang pasyente diha sa VSMMC apan una na kini nga gi-admit sa Balamban District Hospital.
Giingong nagpakita kini og mga sintomas sa meningococcemia.
Tungod niadto,gihatagan og pangproteksyon nga tambal nga prophylaxis ang tanang sakop sa pamilya niini, apil na ang komunidad ug ang mga health care service providers nga nakapaduol kaniya sa wa pa kini namatay.
Ang pangulo sa Regional Epidemiology Surveillance Unit (RESU-7) nga si Renan Cimafranca miawhag sa katawhan nga kun dunay mga mamatikdan nakasinati og susamang sintomas sa meningococcemia sa ilang dapit, ipahibalo kini dayon kanila ug magpa-checkup dayon sa mga tambalanan. (BANAT NEWS)
- Latest
