Airport gikoral sa Briton

CEBU, Philippines – Nagtingkagol na sa selda sa Sta. Fe Police ang usa ka 44-anyos nga Briton human kini gireklamo sa mayor sa maong lungsod nga nangangkon og yuta sa airport sa maong lungsod  diha sa Barangay Ocoy, Sta. Fe Sabado sa hapon.

Ang maong langyaw giila nga si Christopher Paul Alexander, 44, gikatahong  bag-o pa lang nagpuyo sa maong lugar, ug una’ng nagpuyo sa isla sa Bantayan.

Sumala pa ni PO1 Gil Buena sa Sta. Fe Police nga nahinabi sa Banat News,  si Mayor Jose Esgana nangayo og police assistance human nga gipakural sa maong langyaw ang usa ka luna sa maong airport. Matud pa sa langyaw nga iya na nga napalit ang maong yuta  gikan sa usa ka “Maria” nga atoa sa gawas sa nasud. Apan sa dihang gipangitaan kini og dokumento sa mayor, gikatahong nasuko ang langyaw ug miinsister nga iya lang mapakita ang dokumento kun mauli na sa Pilipinas ang tag-iya.

Atubangan sa kapulisan ug mga empleyado sa lungsod gikatahong giingnan sa maong langyaw si Esgana og: “ You are trespassing my property.”

Base sa nakuhang impormasyon sa kapolisan,  30 square meters nga bahin sa maong tugpahanan ang gikoral sa maong langyaw ug gibutangan niya og signage nga “Air Bantayan.” Gitun-an na sa kapolisan ang posibleng kaso nga ipasaka batok sa maong langyaw. -/EIM) (BANAT NEWS)