Drug den gironda

CEBU, Philippines – Onse ka mga tawo ang nasikop sa kapulisan sa lungsod sa Medellin, atol sa usa ka buy-bust operation ang gihimo sa mga operatiba ngadto na sa usa ka drug den sa ma’y Sitio Kamalig, Barangay Panugnawan, Medellin, kagahapon sa alas 7:50 sa buntag.

Gipangulohan sa hepe sa kapulisan sa maong lungsod nga si Senior Inspector Christopher Fernandez ang operasyon nga miresulta sa pagkasikop sa maong mga lalaki lakip ang usa ka kanhi barangay konsehal sa maong barangay.

Target sa operasyon si Roberto Opona, 32, nga giingong maoy tigbaligya og shabu sa maong dapit.

Gidakop og apil diha sa gidudahang drug den sila si Buenaventura Diaz, 37, kanhi konsehal sa maong barangay  ug ang laing siyam ka mga lalaki nga sila si Ernani Sinoy, 35, taga Poblacion Medellin, Rafil Dejito Ypil, 45, Noel Ponpon, 19, taga Libertad, Daanbantayan,Rodeo Cutab, 30, Maya, Daanbantayan, Randy Alarde, 37, nga giingong lineman sa CEBECO II nga nagpuyo sa Lamintak Norte, Medellin, Randy Dadula, 39, taga Lapaz, Bogo City, Dustin Bedrijo, 35, Cogon, Bogo City, Mark Anthony Rondina, 32, Taytayan, Bogo City ug Ian Pepito, 26, taga Panugnawan, Medellin.

Ang siyam ka mga dinakpan pasakaan og kaso tungod sa pagbisita nila sa maong dapit nga giingong usa ka drug den, samtang sila si Opona ug Diaz ang pasakaan og kaso sa drugas ug paghupot og armas.

Sumala pa nga dugay nang gipaubos sa surveillance sa kapulisan ang maong lugar, human sa nakuha nga impormasyon nga naghitak ang ilegal nga drugas sa maong dapit.

Nakuha sa kapulisan ang ubay-ubay nga drugas nga duna’y kantidad nga P18, 644, usa ka .357 magnum revolver nga duna’y unom ka bala, usa ka .9mm pistol, pito ka motorsiklo ug P700 cash nga gituohang halin sa drugas. -/EIM) (BANAT NEWS)