P.8M shabu nasakmit
CEBU, Philippines - Moabot sa kapin P800 mil nga kantidad sa drugas ang nasakmit sa City Intelligence Branch (CIB) ug sa San Nicolas Police Station human sa duha ka managlahing operasyon ang gihimo sa kapulisan.
Pasado alas-5 sa buntag kagahapong adlawa, ang kapulisan sa San Nicolas Police nga gipangunahan ni Senior Inspector Chuck Barandog ang mipatuman sa search warrant gikan ni RTC Judge Soliver Peras batok sa gidudahang level 3 drug pusher sa Magsaysay Street, Pasil, Cebu City nga si Johndel Ceballos, 21.
Atol sa maong operasyon nakuha sa kapulisan ang usa ka dakong pakete, siyam ka medium size ug 19 ka gagmay nga paketeng may sulod nga gidudahang shabu nga nagkantidad og dili mominos P400 mil.
Gitanggong na sa San Nicolas Police detention cell ang dinakpan nga mag-atubang og kaso sa paghupot ug pagbaligya og drugas.
Samtang sa pagka alas-10 sa buntag usa ‘sab ka operasyon ang gihimo sa City Intelligence Branch (CIB) sa Cebu City Police Office batok sa usa ka level 2 drug pusher sa may Villagonzalo II, Tejero, Cebu City.
Apan nakasibat ang suspek nga si Odis Dela Cruz nga matud pang Superintendent Romeo Santander ang hepe sa CIB nga nakalayat sa bintana ang suspek ug nakadagan sa kabalayan.
Sulod sa panimalay si dela Cruz nakuha sa kapulisan ang daghang drugas nga naglakip sa 69 ka tag-as nga plastic nga duna’y sulod nga gituohang shabu nga nagkantidad og P407 mil.
Gibutyag ni Santander nga bisan pa man og nakaikyas ang suspek sa gihapon pasakaan kini og kaso ma’y kalabutan sa ilegal nga drugas. (Jojo C. Ugdol/EIM)(BANAT NEWS)
- Latest
