TV talent gidakop tungod sa rape

CEBU, Philippines - Mitahan sa buhatan sa kapulisan ang usa ka 28-anyos nga kanhi talent sa usa ka television network sa kaulohan human kini gipasanginlan nga milugos ug mi-video sa iyang gibuhat sa usa ka 35-anyos nga babaye kagahapon sa kaadlawon sulod sa usa ka hotel ning dakbayan sa Sugbo.

Ang gireklamo (pangalan gipugngan) taga Manila samtang ang mipasangil kaniya usa ka 35-anyos nga babayeng taga Medellin.

Sumala pa ni Inspector Arieza Otida ang hepe sa Womens and Children Protection Desk sa Cebu City Police Office nga nagkaila ang duha sa usa ka bar sa Mango Square.

Ang babaye mipasangil nga dihang nahubog na siya gidala siya niini sa usa ka hotel ug didto gilugos ug gikuhaan pa kini sa suspek og video.

Ang suspek dihang gikuhaan og pamahayag sa Banat News nagdumili sa pagtubag ug miingon nga “official business” ang iyang tuyo dinhi. Si Senior Inspector Wayne Magbanua ang hepe sa Waterfront Police mibutyag nga ang suspek mitug-an nga nagtuo siyang nagkasinabot ra silang duha sa babaye nga maghilawas ug nasuko kini dihang wala niya hatagi sa gipangayong P10 mil.

Nagpaabot pa ang kapolisan sa resulta sa eksaminasyon sa babaye aron himuong basehan sa pagpasaka og kasong rape sa kanhi tv talent. (Jojo C. Ugdol/EIM)(BANAT NEWS)