Public hearing gihangyo sa mga vendors

CEBU, Philippines - Nihangyo ang mga tindera sa Tabunok Public Market nga ipahigayun ang usa ka public hearing sa pagpatukod sa bag-ong merkado.

Kini atol sa pagtambong sa kadagkuan sa pundok sa mga manindahay sa sesyon sa konseho sa dakbayan sa Talisay.

Gipasalig ni Konsehal Danilo Caballero nga dunay public hearing nga himoon isip tipik sa proseso sa pag-aprobar sa pagpatukod sa bag-ong tulo ka andanang building sa Tabunok Public Market.

Gihimakak ni Konsehal Richard Aznar nga sugdan na ang pagpatukod sa maong building karong Nobiyembre.

Matud niya nga wala pa hingpit naaprobahan ang maong proyekto tungod kay moagi pa kini sa proseso sama sa feasibility study.

Gihangyo ni Bise Mayor Romeo Villarante ang mga tindera nga dili maminaw sa mga sulti-sulti sa pagdaut mahitungod sa maong proyekto.

Gihingusgan sa mga tindera sa Tabunok ang ilang pagsupak sa pagpatukod sa tulo ka andanang building.  (BANAT NEWS)