Nagmotor namatay nadam-ag sa prime mover

CEBU, Philippines - Namatay ang usa ka 33-anyos nga lalaki diha nga nadam-ag kini sa prime mover nga sakyanan ni Asturias Mayor Allan Adlawan nga gi-parking sa karsada sa Barangay Calong-calong, Toledo kaniadtong Miyerkules sa gabii.

Ang namatay mao si Herbert Lamila taga Sityo Drilling, sakop sa Barangay Poblacion, Toledo. Ang drayber sa prime mover mao si Roderick Sarni, 34, minyo nga taga Barangay Biasong, lungsod sa Balamban.

Sila si PO2 Celso Makidato kauban nila ni PO3 Chris Gako ug PO3 Julius Sanchez sa kapolisan sa Toledo mitug-an nga gikan sa dakbayan sa Toledo ang biktima ug paingon na unta sa Barangay Calong-calong.

Matud pa kusog kaayo nga nagpadagan sa iyang motor ang biktima ug dihang pag-abot sa maong dapit adunay nagparada nga prime mover mao nga misuway kini pagtipas sa pikas nga lane sa karsada.

Tungod kay adunay gikasugat nga laing sakyanan nibalik si Lamila sa iyang lane  apan nasampak siya sa prime mover. Ang mayor andam mohatag tabang pinansyal sa pamilya sa biktima.  (BANAT NEWS)