Papa nga milubong sa iyang anak gidakop

CEBU, Philippines - Gisikop sa Homicide Section sa Cebu City Police Office ang usa ka amahan nga miangkon nga milubong sa usa ka fetus sa Creekside, General Echavez Avenue, Zapatera, Cebu City, niadtong Martes sa gabii. Ang gidakop  mao si Claros Perales, 52, nagpuyo sa Sitio Caimito, Lorega, Cebu City.

Matud pa ni SPO4 Alex Dacua nga nahinabi sa Banat News, usa ka tawag gikan sa usa ka concerned citizen ang mipahibalo kanila nga dunay fetus nga gilubong sa maong lugar.

Dali nila kining gisusi ug samtang sila nangita sa dapit, giingong miabot si Perales ug nagpaila sa iyang kaugalingon ug siya miangkon nga amahan sa maong fetus ug siya maoy milubong niini. Tungod niini gidakop siya sa mga polis. Nasayran nga kaadlawon sa Martes nanganak ang asawa ni Perales sa Vicente Sotto Memorial Medical Center (VSMMC) apan giingong patay na nga migawas ang bata nga premature kay pito ngadto sa walo pa lang kini ka buwan.

Gipasabot ni Dacua nga bisan og patay na’ng daan ang maong fetus sa paglubong apan nalapas ni Perales ang Sanitary Code sa nasud nga nagdili sa paglubong sa patay nga lawas sa bisan asa ug angayan lang kini nga ipahiluna sa paglubong. (BANAT NEWS)