Ginang gisukmag patay

CEBU, Philippines - Patay ang usa ka 46-anyos nga babaye human kini nakatilaw og sumbag sa iyang ka live-in partner didto sa Sitio Kaype, Cagkagan, Poro, buntag sa adlaw nga Martes.

Ang namatay naila nga si Emelda Suralta, 46, samtang ang gitumbok nga suspek mao si Alexandro Luchavez, 47, nga kapin 20 ka tuig na nga nag-ipon ug aduna’y upat ka mga anak.

Matud pa ni PO1 Jomar Marquez sa Poro Police nga nahinabi sa Banat News  nag-away ang duha tungod kay dugay nakabalik ang lalaki nga gisugo pagpalit og bugas ug hubog na nga naabot sa balay ug way dalang bugas.

Sumala pa ni Marquez nga walay nalung-ag para panihapon ang iyang asawa kay wala’y gidala nga bugas ang suspek, nianang pagkabuntag gikomprontase kini sa biktima ug nasabligan niya kini og tubig hinungdan sa kalagot sa lalaki ug nasukmagan kini sa apapangig.

Sa pakighinabi sa Banat News sa suspek wala siya magtoo nga mamatay ang iyang asawa apan iyang giklaro nga tampalong ra iyang gihimo ug pagkahuman natulog kini apan wa na makamata. Matud niya nabiyaan niya ang bugas tungod sa kahubog. (BANAT NEWS)