Drayber ni Madrigal di empleyado sa Kapitolyo

CEBU, Philippines – Gikompirmar sa gobernador sa lalawigan sa Sugbo nga dili kawani sa Kapitolyo ang nagmaneho sa sakyanan nga gipanag-iya sa probinsya nga gisakyan sa kontrobersyal nga Chief Security Officer nga si Loy Anthony Madrigal nga nakabangga og motorsiklo sa Bogo sa miaging Domingo sa gabii.

Si Gov. Hilario Davide III mibutyag niini atol sa pakighinabi sa mga tigbalita base sa impormasyon gikan ni Atty. Mark Tolentino, ang Provincial Administrator nga nag-ingong  dili trabahante sa Provincial Capitol si Alberto Naraja, 45, nga taga San Remigio.

Si Naraja maoy gikatahong nagmaneho sa Mitsubishi pick up nga nagtangag sa plaka nga SJC 600 ug nakabangga sa magtiayon nga sila si Felix ug Marites Mirambel, diin nakabsan sa kinabuhi sa tambalanan si Felix.

Sumala pa ni Davide nga nag-apply isip job order si Naraja sa Kapitolyo apan wala pa napirmahi ang iyang kontrata.

“Kining tawhana  (Alberto), according ni Atty. Tolentino, mi-apply unta as Job Order (employee) but wa pa napirmahi iyang kontrata. He is not yet a JO. Therefore (he) is unauthorized to drive that vehicle,” sigon ni Davide.

Dugang niya nga adunay memorandum nga giisyu kaniadto nga dili maka-function ang tanang mga JO kun ang kontrata wa pa napirmahi.

“Why did he (Madrigal) allow somebody who is not an employee of the Provincial Capitol to drive the vehicle? All government-issued vehicles should only be driven by the employees of the Provincial Capitol,” matud niya.

Tungod sa maong nahitabo, mimando si Davide og 15 ka adlaw nga preventive suspension batok ni Madrigal samtang giimbestigar pa kini sa Committee on Discipline and Investigation nga gipangulohan ni Tolentino.  Si Madrigal kasamtangan nga on-leave sugod niadtong Lunes.

Samtang gimandoan sa hepe sa Cebu Provincial Police Office (CPPO) nga mohimo gilayon og imbestigasyon ang hepe sa Provincial Investigation Detection and Management Branch (PIDMB) ug patubagon ang chief of police sa siyudad sa Bogo nga si Superintendent German Mallari.

Kini ang gipadayag ni Senior Superintendent Noel Gillamac ang hepe sa Cebu Provincial Police Office nga nahinabi sa mga tigbalita kagahapong adlawa human wala mosunod sa proseso ang mga polis sa pagproseso sa maong aksidente.

“Sa akong nakita wala man gyod na-follow, that’s why mas maayo g’yud siguro naay investigation atong ipahimutang aron masayod ta naa ba’y violations ang atong chief of police  ug ang traffic investigator”, sigun pa ni Gillamac.

Matud pa ni Gillamac nga sa normal nga proseso,  kun dunay aksidente sa kadalanan ilabi kun dunay mamatay kuhaon gilayon ang lisensya sa nakabangga ug ipaubos kini sa liquor test, apan wa kini himoa sa mga polis.

Buot usab klaruhon ni Gillamac ang report nga gitionan pa og armas sa mga sakay sa pickup ang usa sa mga biktima sa aksidente. Matud pang Gillamac motabang sila kun moreklamo ang survivor batok ni Madrigal ug sa mga kaubanan niini. -/EIM) (BANAT NEWS)