Tungod ni Madrigal

CEBU, Philippines – Si Capitol Civil Security Unit chief Loy Anthony Madrigal gipasanginlan sa bana sa iyang sekretarya nga siya (Madrigal) ang hinungdan sa ilang panagbuwag niadtong Enero karon tuiga.

Kini sukwahi sa mga report nga “single parent” na daan ang maong sekretarya sa dihang giingong nakigrelasyon kini ni Madrigal.

Gibutyag ni Redero “Red” Ramonito Camello, 27, bana sa sekretarya nga sukad sa Nobiyembre sa miaging tuig nga nagtrabaho ang iyang asawa isip sekretarya ni Madrigal  dugay na kini mouli sa ilang balay.

Dugang niya nga usahay kuhaon sa mga tawo ni Madrigal ang iyang  asawa bisan kaadlawon  ug duna say higayon nga si Madrigal g’yud mismo ang mokuha sa iyang asawa gamit ang sakyanan nga gituohang panag-iya sa gobiyerno.

Tungod niini, nagduda na siya ug maoy hinungdan sa sige nila og away sa iyang asawa.  Matud niya nga nakabantay siya nga kanunay may kwarta ug mga mahalong butang ang iyang asawa nga giingong gikan ni Madrigal, sama sa P2,000 matag semana, cellphone, ug refrigerator.

Niadtong Enero 28 karong tuiga, matud ni Red nga migrabe na ang ilang panag-away ug gibiyaan siya sa iyang asawa dala ang ilang duha ka anak.  Walo na ka tuig nga nagpuyo ang duha apan sa miaging tuig lang sila nagpakasal.

Gibutyag usab sa igsuon ni Red nga si Tessie Jean Camello nga niadtong birthday niya sa Pebrero 4 karong tuiga, kuhaon unta ni Red ang duha niya ka anak apan gidala kini sa iyang asawa sa pier aron dad-on sa Leyte apan napakyas sila kay gi-iskortan og security sa Kapitolyo ang asawa niini.

Apan kining tanan gihimakak ni Madrigal dihang gikahinabi sa Banat News. Matud niya nga dili tinuod nga kuhaon niya ang sekretarya bisan gabii na o kaadlawon ug hinatagan niya kini og mga mahalong butang.

“Pero dihay inspection sa sand and gravel ‘to nga mauli namo siya (sekretarya) og gabii na. Ibutang pa man gani namo siya as apprehending officer kay siya man ang mag-prepare sa mga dokumento,” sigon ni Madrigal.

Si Medellin Mayor Ricardo Ramirez, ang nag-post sa hulagway ni Madrigal ug iyang sekretarya nga misandig sa iyang abaga, ang mikuyog sa bana atol sa press conference kagahapon.

Iyang panghinaot nga dili na lang siya mangayo’g reconsideration sa desisyon ni Gobernador Hilario Davide III nga pakanaugon siya sa pwesto.

Makighinabi karong adlawa si Madrigal kang Davide. Matud ni Madrigal nga plano usab niyang pasakaan og kasong libel si Ramirez tungod sa mga atake niini kaniya sa social media nga matud niya pulos mga bakak ug pangpanaot lamang.  -/EIM) (BANAT NEWS)