Karsada gipasidungog sa abogada

CEBU, Philippines -  Ang W. Geonzon Street nga nahimutang sa Barangay Apas apan kabahin kini sa IT Park, mahimo g’yud nga maagian sa bisan unsa nga sakyanan, walay labot kadtong mga heavy equipment nga makapaguba sa karsada.

Gani si Mayor Michael Rama sa dili madugay moisyu na og kamandoan nga gub-on ang sementado nga koral nga nag-uwang sa Cebu Property Ventures and Development Corporation (CPVDC) ug sa luna nga gigamit kaniadto sa Bagong Buhay Rehabilitation Center (BBRC).

Ang BBRC mao ang prisohan kaniadto sa dakbayan sa Sugbo apan ang kagamhanan naghimo og lain nga Cebu City Jail sa Barangay Kalunasan ug gibiyaan ang karaan nga bilanggoan.

Ang luna nga gigamit kaniadto sa BBRC gitukoran karon og dako nga idipisyo nga “joint project” sa Kapitolyo ug sa Filinvest Land Incorporated (FLI) ug buot sa mayor nga walay koral sa utlanan sa Filinvest ug IT Park.

Nahimo nga kontrobersyal ang W. Geonzon Street kay samtang gideklarar kini nga “public road” sa konseho, ang yuta nga gigamit nga karsada kabahin pa sa property sa CPVDC.

Daghan ang militok og sayop sa ngalan sa karsada, apil ang mga opisyal sa dakbayan sa Sugbo ug mga sakop sa media. Ang Geonzon ila nga gilitok nga “Dsyonson.” Ang tukma nga paglitok sa ngalan sa maong karsada mao ang “Heyonson.”

Ang karsada nga nagsukad sa Salinas Drive paingon sa Barangay Apas lagbas sa atubangan sa karaang BBRC gihinganlan og W. Geonzon Street nga maoy agi og  pagpasidungog ni Atty. Winefreda Geonzon, ang kanhi tsirman sa Free Legal Assistance Volunteers Association (Free-LAVA). Si Geonzon kusog kaayo nga motabang sa mga binilanggo nga wala makabaton og mga abogado nga molaban sa ilang mga kaso.  (RUB) (BANAT NEWS)