Upat nabuy-bust

CEBU, Philippines -  Upat ka tawo ang nadakpan tungod sa pagpamaligya og shabu atol sa managlahing buy-bust operation sa kapolisan niadtong Biyernes ug Sabado.

Ang nadakpan giila ni PO3 Jesson Gayo sa Liloan Police Station nga mao sila si Alejandro Rosal Jr., 50, ug Dionie Noval, 34, pulos taga Sitio Looc, Barangay Poblacion sa nahisgutang lungsod, ang duha nadakpan sa Purok Indian Tree, Barangay Jubay, Lungsod sa Liloan niadtong Biyernes.

Matud pa ni Gayo nga si Senior Inspector Ramil Morpos maoy nangulo sa buy-bust operation human sa pipila ka adlaw nga pagpaniid sa mga suspetsado sa nahisgutang lugar.

Dugang pa ni PO3 Gayo nga ang ilang kaubang polis nga poseur buyer maoy nagtunol sa marked money nga P200 ngadto kang Rosal bugti sa usa ka paketeng shabu.

Pagtunol ni Rosal sa usa ka paketeng shabu dali kini nilang gisignit ug nakuha pa nila ang dugang ebidensiya nga naglakip sa dakong paketeng shabu ug P400 nga salapi nga gituohang halin niini.

Nunot sa pagkasikop ni Rosal  maoy kauban niini si Noval nga nakuhaan usab og usa ka dakong paketeng shabu, upat ka tin foil ug duha ka lighter ug usa ka  gunting.

Ang duha ka dinakpan nga temporaryo karong gitanggong alang sa pagpasaka og kaso paglapas sa Republic Act 9165 o Comprehensive Dangerous Drug Act of 2002.

Samtang nadakpan usab sa Lapu-Lapu City Police Station 2 kagahapon sa kaadlawon sa Sitio Casanta, Barangay Mactan dakbayan sa Lapu-Lapu sila si Hardy Augusto, 31 anyos, Sitio Soong II ug Owen Pulvera, 40,  residente sa Sitio Mahayahay, Barangay Bankal.

 Nadakpan ang duha nila ni Senior Inspector Virniño Noserale ug nakuhaan og usa ka gamay’ng pakete ug usa ka medium pack nga pulos may sud nga gituohang shabu  ug drug paraphernalia.

Gawas sa drugas, usa ka dili lisensyado nga .45 caliber pistol nga dunay magazine ug lima ka bala ang nakuha kanila. (BANAT NEWS)