Armas, shabu nasakmit
CEBU, Philippines - Nakasibat ang usa ka gidudahang drug pusher samtang nasikop ang duha ka lalaki sa buy-bust operation human sila nakuhaan og dugas ug armas pasado alas 11:00 sa miaging gabii sa barangay Mantalongon sa lungsod sa Dalaguete.
Ang nakaipsot nga subject sa maong buy-bust operation naila nga si Crispin Otom, molupyo sa nahisgutang lugar. Samtang ang nasikop naila nga sila si Frankie Ambrad ug si Julito Belia.
Usa ka polis ang nagpakaaron- ingnon nga user ug mipalit og shabu nga mobalor og P500 kang Otom, apan giingong nakabantay kini ug misulod sa usa ka vulcanizing shop ug nakaikyas.
Narekober gikan ni Ambrad ang upat ka gamay nga pakete nga gituohang shabu, .22 kalibre nga revolver nga walay bala, duha ka magazine sa usa ka rifle nga may duha ka bala sa .9mm usa ka fragmentation grenade, ug drug paraphernalia. Samtang narekober gikan kang Belia ang pipila ka drug paraphernalia.
Si Otom mag-atubang gihapon og kasong drug pushing bisan pa nga nakaikyas kini. (BANAT NEWS)
- Latest
