Bala miungot sa aping

CEBU, Philippines -  Niungot ang bala sa nawong sa usa ka 64-anyos nga lolo nga gi-atangan ug gipusil sa upat ka armadong lalaki niadtong Biyernes sa buntag sa Calog-ogan Barangay Holomaynon sa lungsod sa Dalaguete.

Ang biktima naila nga si Honorato Quevedo, 64, nga molupyo sa maong lugar kinsa maayong pagkaigo sa iyang aping ug miungot ang bala niini.

Samtang ang gipasanginlang mga suspek naila nga sila si Benjamin Salonoy, 35, Edilio Salonoy, 25 Leonardo Salonoy, ug si Jonathan Moran, 26, mga molupyo ra sa maong lugar. Si PO3 Cleto Pia, imbestigador sa Dalaguete nga nahinabi sa Banat News miingon nga samtang naglakaw ang maong biktima ug naglukdo og kumpay niadtong tungora dihang gibabagan kini sa mga suspek. Matud pa nga walay daghang pangutana kalit lang gipusil sa upat ang nawong ug dughan sa biktima apan nakadagan maong gigukod kini hangtud nga nakauli kini sa ilang balay. Ang mga suspek  dali nga mibiya  samtang ang anak sa biktima daling nakatawag og polis ug mao nay midala niini sa tambalanan.

Matud pa nga miungot ang bala sa bukog sa aping ni Quevedo ug ang bala nga naa sa ubos nga bahin sa iyang dughan.

Sumala pa ni Pia nga posibling dumot ang motibo sa maong pagpamusil. Dugang ni Pia nga niadtong Mayo 7, 2014 napusilan ‘sab sa mao gihapong grupo ang anak sa biktima hinungdan sa pagkaangol niini.

Matud pa nga posibling gibalikan sa upat si Quevedo tungod sa kalagot nila nga wala na mobalik ang anak niini ug siya na lang maoy gipanimaslan.

Matud ni Pia nga nangahadlok na ang mga residente sa maong lugar lakip na sa mga opisyal sa barangay tungod kay bisan sila tak-om ang baba dihang gipangutana kabahin sa hitabo.

Si Benjamin Salonoy matud pa nag-atubang na og kasong murder samtang naa pay kaso sa Cebu Provincial Prosecutors Office ang laing tulo. Karong adlawa ipasaka na usab nila ang laing kaso batok sa upat  nga frustrated murder. (BANAT NEWS)