Koral sa kanhi BBRC ipaguba

CEBU, Philippines - Ipaguba ni Cebu City Mayor Michael Rama ang koral sa kanhi city jail. Kini aron maagian sa publiko ang W. Geonzon Street sa barangay Apas nga gideklarar sa kagamhanan sa siyudad nga “public street”. Ang maong luna nga gihimong karsada gipanag-iya sa Cebu Property Ventures and Development Corporation (CPVDC) nga nag-ugmad sa Cebu IT Park. Ubos sa legal opinion sa City Legal Office nga ang nahisgutang karsada gigamit na kining public road bisan sa wala pa ang Cebu Asiatown, I. T. Park maugmad diin diha daplin sa maong karsada nahimutang kaniadto ang main gate sa Bagong Buhay Rehabilitation Center (BBRC).

Niadtong Hunyo 1, 2007 sa wala pa ang application sa CPVDC, ang Local Board of Assessment Appeals (LBAA) sa dakbayan sa Sugbo mideklara nga ang W. Geonzon Street exempted sa real property tax ubos sa rekomendasyon sa Cebu City Assessor’s Office tungod kay ang maong karsada gigamit kini sa publiko. Ang maong karsada iyaha gihapon sa CPVDC apan buksan kini isip public access pinaagi sa pagtangtang sa koral.

Sa milabay’ng buwan ang konseho sa dakbayan mipalabang og resolusyon sa pagdeklara sa W. Geonzon Street nga usa ka public road.

Tipik sa nahisgutang resolusyon nga ang Geonzon Street gigamit kini nga travel route sa mga public utility jeepneys paingon ug gikan sa Apas diin ang rota gilatid sa “Travel Line” ordinance sa dakbayan. (BANAT NEWS)