Mga titser gidepensahan sa ilang labaw

CEBU, Philippines - Walay tulubagon ang mga magtutudlo sa gidangatan sa tulo ka mga estudyante sa Calagasan National High School sa lungsod sa Argao nga gipang-anod sa sapa ug nangamatay.

Kini maoy pagdepensa ni Dr. Arden Monisit, Provincial Schools Division Superintendent ngadto sa mga magtutudlo tungod kay matud pa niya gibuhat sa mga magtutudlo ang tanan aron kapanalipdan ang ilang mga tinun-an.

Una niini, kagahapon, sunod-sunod nga naugkat ang patay nga lawas sa mga biktima nga sila si Caroline Marzon, Richelle Pasaje pulos 15 anyos ug Earl Kyle Sardido, 13 anyos.

Gumikan sa nahitabo ang DepEd nanawagan og suportang financial ug pag-ampo alang sa mga pamilya sa tulo ka mga bata. Gipaabot pa usab ni Monisit ang situational report aron ilang masayran ang kinatibuk-ang panghitabo.

Gani, dunay gipagawas nga memorandum ang DepEd Cebu Province nga nagmando sa tanang magtutudlo nga personal nga hinabion ang ilang mga tinun-an aron masayran kun unsay mga kalisdanan nga ilang naagian aron mapangitaan og solusyon.

Ang Regional Director sa DepEd Dr. Carmelita Dulangon sa iyang bahin mipadayag nga mag-agad siya sa himoon sa division level una mohimo og kaugalingong aksyon. (BANAT NEWS)