Unom ka mga kawani gidudahan

CEBU, Philippines – Hanap na nga makabalik sa ilang trabaho ang tulo ka mga kawani sa siyudad sa Toledo nga gidudahang nalambigit sa pagpanglungkab ug misakiyo sa kapin usa ka milyon ka pesos nga kwarta gikan sa Treasurer’s office.

Matud ni Toledo City Mayor John Henry Osmeña nawad-an na siya og pagsalig sa tulo ka mga kawani apan wala niya gibutyag ang ilang mga pangalan.

Nasayran nga gipadala na niya ang tulo sa buhatan sa National Bureau of Investigation kun NBI aron ipaubos sa lie detector test.

Gumikan sa nahitabo ug aron usab nga malikayan nga masubli pa ang nahitabong kawat ipa-deposito na gilayon ang ilang makolekta nga buhis.

Si Osmeña ingon man ang kapulisan nagtuo nga inside job pagpanglungkab sa City Treasurer’s Office.

Si Toledo City Police Station chief, Ricky Delelis, mibutyag nga duna pay laing duha ka mga kawani nga gisuspetsahan ug usa ka kolektor.  “I am convinced na inside job. Wala nang iba,” matud niya.

Tungod kay di pa man mapiho kon pila g’yuy eksaktong kantidad sa nawala, gibanabana kining mokabat g’yud og kapin usa ka milyon ka pesos.

Gihangop usab ni Delilis ang paghimo sa NBI og parallel investigation. “We welcome the help of the NBI and will coordinate with them. Magkakaroon ng team effort para mapadali ang paglutas ng kaso na ito,” matud niya.

Kahinumduman nga pasado alas-6 niadtong Domingo, usa ka Lynmer Caballero Formento nga kawani sa treasurer’s office maoy nakadiskubre nga gilungkab ang ilang buhatan.

Nunot sa hitabo, ang mayor ug ang kapulisan mimando nga butangan og pulis ang City Hall gawas sa duha ka sakop sa civil security unit nga maoy gipabantay sa lugar. Sunod-sunod ang nahitabong pagpanglungkab sa mga munisipyo sa kalungsoran sa Sugbo, ang unang insidente nahitabo sa lungsod sa Compostela, Carmen, Sogod, Pinamungajan ug ning bag-o lang siyudad sa Toledo. -/EIM) (BANAT NEWS)