Ban-Tal Group palig-unon

CEBU, Philippines – Palig-unon sa kagamhanan sa dakbayan sa Sugbo ang gitukod nga  Banilad-Talamban (BANTAL) Traffic Management Group aron pagpaluag sa trapiko sa nahisgutang lugar.

Ang kagamhanan nagtinguha sa pagtukod og ad-hoc committee, multi-agency ug multi-sectoral body nga mo-coordinate sa tanang lakang tumong sa kasulbaran sa problema sa trapiko sa Banilad-Talamban area.

Karong Oktubre 15 tukion sa ipahigayon nga executive session ang maong plano nga tambongan sa Ban-Tal Traffic Management Group ug City Traffic Operation Management (CITOM).

Si Mayor Michael Rama niadtong buwan sa Hulyo niluwat og executive order sa pagtukod sa maong grupo.

Ang Banilad-Talamban (Ban-Tal) corridor maoy agianan sa Asilo De Milagrosa Church, Gorordo Avenue paingon ngadto sa Gov. M. Cuenco Avenue hangtud sa atubangan sa gym sa barangay Talamban.

Ang nahisgutang karsada busy kaayo ang trapiko tungod sa mga commercial ug educational establishments ug ingon man sa mga residensiya. -/GMR) (BANAT NEWS)