18 ka tawo naangol sa bangga

CEBU, Philippines - Nag-atubang karon og bug-at nga kaso ang usa ka 22-anyos nga drayber og trak de karga human nga dise-otso ka tawo ang nangaangol dihang iyang nabanggaan ang usa ka multicab diha sa barangay Dumlog dakbayan sa Toledo niadtong Domingo sa gabii.

Ang multicab gimaneho sa usa ka Cornillo Oberes taga Barangay General Climaco, Toledo City samtang ang drayber sa cargo truck mao si John Mark Cabonero, 22, taga Barangay Tinaan, dakbayan sa Naga.

Sa imbestigasyon ni PO3 Julius Sanchez sa Toledo City Traffic Section, gikan sa Barangay Sangi, Toledo City ang multicab nga gisakyan sa mga biktima ug paingon na untang mopauli sa Gen. Climaco dihang pag-abot sa kurbadahon nga bahin sa Dumlog gikasugat niini ang maong trak gikan usab sa San Remigio.

Giingong nilapas sa center lane ang multicab hinungdan nga nabangga kini sa trak nga paingon sa Naga.

Usa ka Benjamin Capacite nga sakay sa multicab ang gibalhin sa tambalanan sa dakbayan sa Sugbo human maoy nagrabehan. Samtang ang ubang biktima ang padayon nga giatiman sa Toledo City Hospital.

Si Cabanero nga gipaubos sa liquor test sa Toledo City Hospital nagpositibo nga nakainom og ilimnong makahubog. (BANAT NEWS)