Forest Ranger gipatay

CEBU, Philippines - Patay ang usa ka deputized forest warden sa Department of Environment and Natural Resources -7 human kini giatangan sa usa ka menor de edad ug gipusposan sa ulo sa miaging gabii  diha sa lungsod sa Dalaguete.

Ang namatay naila nga si Rolando Acosta, 52, nga taga Sitio Kanwaling, barangay Bulak sa maong lungsod,   sakop sa “Bantay Lasang” ug deputized forest warden sa DENR-7. Gikan sa balay sa ugangan ang biktima kauban ang uyoan niini ug padung na pauli dihang  pag-abot sa nahitaboan kalit mibutho ang suspek ug way daghang estorya gipusposan ang ulo ni Acosta gamit ang usa ka gahi nga butang hinungdan sa pagkalup-og niini ug namatay.

Nasuta sa imbestigsayon nga ang biktima ug ang maong gituohang menor de edad nga suspek di na maayo og tinagdanay kay pirmeng masakpan ang suspek nga mamutol og kahoy aron ulingon.

Nagduda ang kapolisan nga nagdumot ang suspetsado sa biktima tungod niini. Ang suspek padayon pang gipangita sa kapolisan. (BANAT NEWS)