Deboto sa Birhen Maria nagsugwak

CEBU, Philippines – Wala panumbalinga sa liboan ka mga deboto ang dili maayong panahon aron lang makahikap sa sidsiran sa sapot ug kapa sa Birhen Maria atol sa adlaw niini kagahapong adlawa nga gisaulog sa Simbahang Katoliko.

Ang Marian Shrine sa Upper Lindogon, lungsod sa Sibonga ang gihugupan pag-ayo sa mga deboto gikan pa sa lain-laing dapit.

Gihulagway ni Police Senior Insp. Joeson Parallag, pangulo sa augmentation team sa Lindogon gikan sa Regional Public Safety Battalion-7 nga “manageable” lang ang sitwasyon sa lugar.

Ang augmentation team sa Lindogon gilangkuban sa mga sakop sa RPSB-7, Sibonga Police Station, SWAT, K9 Unit, ug ubang sakop sa Cebu Provincial Police Office.

Sila ang nihan-ay sa mga tawo gikan sa entrada hangtud sa sulod sa simbahan ug laing grupo ang nihan-ay sa trapiko gawas sa shrine.

Matud ni PO2 Ederlino Bacusmo, imbestigador sa Sibonga Police Station, nga wala’y gikatahong insidente sa lugar. Si Leticia Sorpes, 40-anyos nga taga Hagtu, Mabinay, Negros Oriental kauban ang iyang pamilya nibyahe lang gikan sa ilang lugar aron mobisita sa Marian Shrine sa Lindogon.

Samtang napuno usab ang mga misa sa simbahan kagahapon.

Sa Cebu Metropolitan Cathedral, si Manong Rey Ople nga namaligya og buwak mibutyag nga iyang giampo kang Mama Mary nga unta pinaagi sa iyang pagpamaligya buligan siya aron isapar sa ilang inadlaw-adlaw nga panginahanglanon.

Bisan pa man og nag-wheelchair ug dili makalakaw tungod kay dunay piang ang tiil human madakin-as, walay makapugong kang Manang Trining sa pag-adto sa simbahan

Mapasalamaton si Manang Trining sa Mahal nga Birhen tungod kay bisan sa nahitabo kaniya apan gilugwayan gyud ang iyang kinabuhi ug gihatagan pa siya og higayon nga makasimba atol sa adlaw’ng natawhan sa inahan sa Dios. -/GMR) (BANAT NEWS)