Balay girakrakan, usa patay, duha angol

CEBU, Philippines – Usa ang patay samtang naangol ang duha niini ka mga kabanay human sila gipamusil alas- 9 pasado ang takna sa miaging gabii sa Barangay Binaliw, Dakbayan sa Danao.

Ang namatay mao si Jimenez Capol Perez, 40, ug ang grabeng naangol mao sila si Antonio Gomez Martel, 28, ug Elmer Matugas Perez, 30, pulos nagpuyo sa maong dapit.

Si PO2 Arnold Gomez sa Danao Police Station miingon bisita sa namatay sila si Antonio ug Elmer niadtong gabhiona ug samtang sila nagtabi sud sa balay, kalit silang girakrakan sa pagpusil sa wa mailhing mga mamumuno gikan sa gawas. Si Jimenez naigo sa tiyan ug uban pang bahin sa lawas, samtang nalapsan usab sa bala ang paa ni Antonio ug milapos sa tiyan ni Elmer nga maoy hinungdan nga dali silang gidala ngadto sa Danao Hospital.

Dugang pa ni Gomez gideklarar nga patay na si Jimenez samtang sila si Elmer ug Antonio dali usab nga gibalhin sa Vicente Sotto Memorial Hospital sa Dakbayan sa Sugbo. Lima ka mga kabhang sa kalibre .45 ug mga deformed slugs ang nakuha sa crime scene. Wa pa matino sa kapolisan ang motibo sa maong pagpangrakrak. -/EIM) (BANAT NEWS)