Mo-resign kon treasurer’s office lungkabon
CEBU, Philippines – Andam mo-resign ang hepe sa Cebu City Police Office Senior Superintendent Noli Romana kon mahitabo nga lungkabon ang City Treasurer’s Office sa Cebu City hall. Sumala pa ni Romana nga dakong kauwaw kaniya isip hepe sa kapolisan sa dakbayan kung mahitabo kini.
Matud ni Romana nga trabaho sa polis ang pagpugong sa mga krimen busa angay nga magmatngon ang kapolisan kanunay.
Si Superintendent Romeo Santander sa City Intelligence Branch nga nahinabi sa mga tigbalita miingon nga gawas sa Civil Security Unit nga nagbantay sa City Hall duna say mga blue guards ang city hall. Dugang pa niini ang Tourist Police nga naa mismo ang buhatan duol sa city hall.
Si Santander miingon nga sa pagkakaron wala silay na-monitor nga mga grupo nga posibleng may kapasidad sa paghimo sa maong krimen diha sa city hall.
Hinuon gihangyo ni Santander ang mga security officers ug sa kapolisan nga dili mokompiyansa. Sa nakalabay’ng semana gilungkab ang treasurer’s office sa lungsod sa Pinamungajan diin nadagit ang kapin P450 mil, samtang sa lungsod sa Compostela, Carmen ug Sogod ang gilungkab usab diin dul-an P170 mil ang nadagit sa mga kawatan. -/EIM) (BANAT NEWS)
- Latest
