Mayor Alegado wa masurpresa

CEBU, Philippines – Wala na masurpresa ang mayor sa lungsod sa Consolacion sa report nga naggikan sa iyang lungsod ang kadaghanan sa mga piniriso sa Cebu Provincial Detention and Rehabilitation Center.

Matud ni Mayor Teresa Alegado sa Consolacion nga kini resulta sa kusog nga kampanya sa lungsod batok sa ilegal nga drugas. Matud niya hapit kada adlaw dunay madakpan sa iyang lungsod. “I am not surprised kay everyday dakop man g’yud. Gamay or dako dakop, hipos na lang. Kanus-a pa man nato sila mapatagam kung di nato sila ipapriso,” sigon ni Alegado.

Dugang niya nga way dapig-dapig ang pagpanakop sa ilang lungsod bisan pa man og adunay moduol niya nga mga kabanay sa mga nadakpan tungod sa drugas.

“I told them friends ta, kay mao man g’yud ning mga ginikanan mohangyo sa mayor kong madakpan ilang anak, pero katong makasala, ilang anak ba or ilang bana ba ron, ako silang giingnan ayaw na lang pakita nako, kay apilon pa tika,” matud ni Alegado. Apan bisan pa sa gihingusgang kampanya, nagtuo gihapon siya nga aduna pay presensya sa ilegal nga drugas sa ilang lugar ug gusto niya silang hutdon og padakop.

“I know everywhere naay drugs, kining menace di na g’yud ni maputol siguro but I pray, nothing is impossible with God,” matud niya. Adunay kapin 2, 000 na ang mga piniriso sa CPDRC.

Natala niadtong Hulyo 12, nga sa top 5 ka lungsod nga dunay mga priso sa CPDRC, nag-una ang Consolacion tungod kay dunay kapin 200 nga naggikan sa maong lungsod. Sunod ang Dalaguete nga adunay 158 ka mga piniriso, 142 sa Liloan, 139 sa Argao, ug 88 sa Barili.  Kadaghanan usab sa mga kaso may kalambigitan sa drugas.- /EIM) (BANAT NEWS)