Radiation sa cell site maka-cancer?
CEBU, Philippines - Gisubli sa kadagkoan sa Department of Health (DOH) nga dili pa g’yud angay’ng mahadlok ang mga tawo kon ang ilang balay anaa duol sa mga cell sites sa mga telecommunications company.
Si DOH-7 Regional Director Jaime Bernadas miingon nga hangtod karon wala pa g’yuy scientific evidence nga nakuha nga mosuporta sa kahadlok sa uban nga makapa-cancer ang radiation sa cell sites.
Tubag kini ni Bernadas tungod kay adunay mga lumolupyo sa Sitio Calvary, sakop sa Barangay Apas, dakbayan sa Sugbo nga miawhag g’yud nga kuhaon sa ilang dapit ang duha ka cell sites nga gibutang sa duha ka cellular networks.
Ang mga mipetisyon sa kadagkoan sa National Telecommunications Commission (NTC) nga dalion pagkuha ang duha ka cell site towers nangangkon nga aduna nay pipila sa ilang mga silingan nga nasakit og cancer.
Gitataw hinuon ni Bernadas nga ang DOH walay gahum sa pagmando aron balhinon ang mao nga mga cell site towers. Dinhi sa dakbayan sa Sugbo daghan na kaayo’ng mga gipangtaod nga cell sites apan wala moreklamo ang mga lumolupyo. (BANAT NEWS)
- Latest
