Water outlet para sunog

CEBU, Philippines - Mga water utility company nga nag-operate sa dakbayan sa Sugbo giawhag nga pabutangon og “water outlet” diha sa ilang mga linya sa kabarangayan aron magamit kon adunay moulbo nga sunog.

Ang mao nga “water outlet” gikan kini sa mainline sa koneksiyon sa tubig ug dili kini moagi sa metro sa tubig sa mga konsumidor.

Susama kini’ng mao nga lakang sa gihimo sa Metro Cebu Water District (MCWD) diin aduna sila’y mga fire hydrants nga kakuhaan og tubig sa mga bombero kon may sunog.

Ang ordinansahon nga gisugyot ni Konsehal Dave Tumulak mopugos sa mga water utility company nga nagserbisyo pagsuplay og tubig sa kabarangayan nga mohatag sila og libreng access sa tubig gikan sa “stub out” apan gamiton lang usab kini sa emerhensya.

Si Tumulak miingon nga ang iyang sugyot gibase sa Section 2 sa Republic Act 9514 nga nagkanayon “It is the policy of the State to ensure public safety and promote economic development through the prevention of all kinds of destructive fires.” Ubos sa maong ordinansahon ang barangay kapitan maoy responsable pagproteher sa stub outs aron dili makawat o maguba.

Ang ordinansa maglatid usab nga ang barangay kinahanglan nga aduna g’yuy team sa fire volunteer. (BANAT NEWS)