Duha ka langyaw gitulis, gikawatan

CEBU, Philippines - Dul-an sa P100 mil ang nasakiyo sa duha ka lalaki nga nagsakay og motor nga mitulis sa usa ka Japanese national sa dalan Escario sa dakbayan sa Sugbo sa miaging hapon.

Ang biktima naila nga si Shinjiro Shinkai, 25, nagpuyo sa La Guardia Extension, Barangay Lahug sa dakbayan sa Sugbo.

Base sa imbestigasyon sa kapolisan, nag-atang ang biktima og jeep sa duol sa usa ka fastfood chain sa Escario dihang kalit lang may miduol kaniyang duha ka lalaking nagsuot og itom nga hood  sakay og itom nga motorsiklo dayong tion kaniya og kutsilyo ug mideklarar nga hold-up.

Gikuha sa maong mga lalaki ang bag sa biktima nga may sulod nga laptop nga mobalor og P43 mil, mahalong sunglasses, cell phone, USB, memory card nga mobalor og kapin sa P40 mil. Laing langyaw nga usa ka Amerkano nga naila nga si Steven Richard, 47, nagpuyo sa dalan Plaridel, Barangay Sto. Niño, Cebu City ang midangop sa kapolisan human siya gikawatan sa babayeng iyang gipakatulog sa iyang kwarto sa usa ka hotel.

Matud niya ang maong babaye nagpaila nga si May Tapang,33, taga Alaska, Mambaling nga iyang nasugatan sa dalan Colon niadtong Huwebes.

Giingong naluoy siya niini kay walay makatulgan mao nga iyang gidala sa iyang hotel, apan pagkabuntag wala na kini apil ang iyang cell phone, ipad, ug camera. Maayo na lang nga nailhan sa biktima ang suspek ug nadakpan kini dayon apan ang cell phone lang sa biktima ang nabawi sulod sa iyang balay.  (BANAT NEWS)