Babayeng Nigerian namaak og polis

CEBU, Philippines - Gitanggong sa kapolisan ang usa ka babayeng Nigerian human nga gipaak ang usa ka polis nga miresponde sa kagubot nga gimugna sa maong langyaw gumikan sa kahubog niini diha sa Osmeña Boulevard, Barangay Capitol Site, Cebu City.

Ang nasikop naila nga si Offing Precious Ekie Effiom, 29, kinsa gikatakdang pasakaan og kasong  alarm and scandal, direct assault to persons of authority ug drunkenness. Si PO2 Brando Nacario, desk officer sa Fuente Police nga nahinabi sa Banat News miingon nga dunay mitawag kanila nga usa ka security guard kabahin sa usa ka langyaw nga miligid sa atubangan sa tindahan nga iyang gibantayan.

Si PO2 Florencio Cabanlit usa sa miresponde misuway unta sa pagpabarog kaniya apan misukol kini ug dihang dad-on unta sa presinto kalit niining gipaak ang wala nga kamot sa polis. Gidala si Effiom sa tambalanan ug nakompirmar nga positibo sa liquor test.  (BANAT NEWS)