Negatibo sa MERS-CoV

CEBU, Philippines - Nagpabiling luwas gikan sa gikahadlukang sakit nga Middle East Respiratory Syndrome Corona-Virus kun MERS-CoV  ang Central Visayas human migawas nga negatibo ang lima ka pasahero nga uban sa nars gikan sa Saudi Arabia paingon sa Manila.

Mitug-an si Rennan Cimafranca, hepe sa Regional Epidemiology and Surveillance (RESU) 7 sa Department of Health, nga napamatud-ang luwas ang mga gi-monitor pinaagi sa confirmatory laboratory test nga gihimo didto sa Vicente Sotto Memorial Medical Center.

"Gi-process na karon ang ilang pag-discharge," matud ni Cimafranca human migawas ang resulta kagahapon lang sa udto.

Libre ang pagpaubos sa maong lab test tungod kay ang DOH ang mosagubang sa pagpa-ospital aron ma-monitor ang mga pasyenteng gidudahan nga posibleng dunay MERS-CoV. Sa lima, duha niini taga Bohol samtang tulo ang taga Cebu.

Ang upat gi-admit sa VSMMC ug usa ang atoa sa Governor Celestino Gallares Memorial Hospital human ang usa nga taga Bohol midesider nga anhi lang sa Sugbo magpa-confine.

Usa ang menor de edad nga anak sa laing hamtong nga gi-admit usab nga lakip sa mga gi-monitor sa mga otoridad ug ang nahibiling upat mga hamtong. Duha ang lalaki samtang ang nahibilin mga babaye.

Giklaro ni Cimafranca nga walay nakita nga sintomas sa MERS-CoV sa lima apan naniguro lamang ang DOH. Nauna na nga nag- negatibo ang nars nga taga General Santos niadtong Biyernes nga gikatahapang natakdan sa MERS-CoV didto sa Saudi Arabia.

Bisan pa man nga luwas pa ang Central Visayas sa maong sakit, ang DOH hugot gihapon nga nagbantay batok niini. (BANAT NEWS)