Negosyante gipusil sa mga tulisan

CEBU, Philippines – Nalandig sa tambalanan ang usa ka lalaki human kini gitulis ug gipusil sa duha ka mga tulisan sa sulod sa Food House and KTV, Gate 5 sa La Guardia, Apas, Cebu City, alas 9:10, Huwebes sa gabii.

Ang nabiktima sa pagpamusil ug gitulis naila nga si Prince Darrel Echiverre, 52, nagpuyo sa Hermag, Mandaue City ug sumala pa tag-iya sa maong establisamento.

Matud pa ni PO1 Renato Baldo sa Mabolo Police Station nga nahinabi sa Banat News nga duha ka mga lalaki ang kalit lang misulod sa maong food house ug dayon deklarar og tulis.

Sumala pa sa report sa kapulisan nga armado sa kalibre .45 nga pistola ang usa sa mga tulisan ug dayon mikuha sa salaping cash balor og P2,000 nga kinitaan sa kan-anan ug ang kwintas sa biktima.

Apan bisan nakuha na nila ang ilang tuyo, gipusil pa g’yud sa usa ang paa sa biktima ug dayon dali nga misibat sakay sa usa ka motorsiklo. Ang biktima daling gidala sa usa ka pribadong tambalanan.

Ang hepe sa Crime Scene Investigation (CSI) sa Cebu City Police Office (CCPO) Chief Inspector David Señor nga nahinabi sa Banat News nagkanayon nga usa ka basiyo sa .45 kalibre ang ilang nakuha sa crime scene. Gitug-an ‘sab ni Señor nga wala sa’y close circuit television (CCTV) ang maong kan-anan nga dako unta og matabang sa pagsulbad sa maong krimen.

Samtang, duha ka lalaki ang nasikop sa Fuente Police human ang usa nakuhaan og toy gun  ug bala atol sa  checkpoint sa Waling-waling Street, Capitol Site, Cebu City, kagahapon sa buntag.

Ang duha giila nga sila si Domiciano Tindog, 26, nga nakuhaan og replica sa 9mm pistol ug si Reckson Villahermosa, 31,  pulos taga Kamputhaw, Cebu City nga nakuhaan og duha ka bala.

Matud pa ni Chief Inspector Wildemar Tiu ang hepe sa Fuente Police nabantayan ang duha nga daling mihunong pagkakita sa checkpoint.

Sumala pa nga misumangil pa og palit kilid sa tindahan si Tindog ug ang kauban niini dali nga mipalayo. Nakit-an sa hawak ni Tindog ang maong armas nga dihang gihiling replica ra diay kini.

Human nila  masikop si Tindog, ilang gi-text ang kauban niini nga mobalik sa area ug  sa pagbalik niini ila sab kini girekisa hinungdan nga nasakpan ang duha ka bala. - /EIM (BANAT NEWS)