Usa angol sa landslide

CEBU, Philippines - Dunay babaye nga naangol ug usa ka container van naanod sa baha diha’ng mibunok ang kusog nga uwan kagahapon sa hapon nga nakamugna og pagdahili sa yuta sa unom ka dapit sa Barangay Guadalupe ug Sapangdaku, dakbayan sa Sugbo.

Si Feliza Alegado, 39, taga Sitio Lupa sa Sapangdaku nakaangkon og samad sa iyang ulo kay naligiran og dakong bato gikan sa midahili nga mga lapok. Dali nga gidala si Alegado sa ospital. Si Konsehal Dave Tumulak miingon nga duna ‘say landslide sa Sitio Kanaas ug Sitio Tipolo Ville nga sakop sa Guadalupe, Sitio Ginasawgan, Sitio Bangkal, Sitio Kaimitohan ug Sitio Lupa, pulos sakop sa Barangay Sapangdaku.

Matud ni Tumulak nga usa ka 10-foot container van nga iya sa Helpmate Inc. nga gibutang daplin sa karsada nga duol sa sapa natulimbang kay midahili ang lapok.

Ang container van naanod sa baha ug gibanlas nga diriyot makaapekto sa tulo ka balay daplin sa sapa. Dali nga gipabakwit ang mga tagbalay. Didto sa Sitio Kanaas, Guadalupe duha ka balay nga ila ni Evelyn ug Cresencio Gabucan ang hapit mataboni sa naluka nga dakong punoan sa kawayan. Ang tagbalay nakadungog na lang og kusog nga lagapak ug nahugno dayon ang punoan sa kawayan sa ilang atop. Matud ni Cresencio nga ang iyang mga sakop sa pamilya didto sa sulod sa balay atol sa hitabo.

Matud ni Evelyn nga wala gayud sila nagtuo nga mahugno ang dakong punoan sa kawayan nga nag-umbaw sa ilang balay. Ang tubig sa sapa maoy ilang gibantayan nga motubo.

Midahili ‘sab ang pundasyon sa tulay sa Oprra ug Guadalupe Bridge ug gikabalak-an nga kini mahugno. Usa ka molupyo nga si Rogelio Vallecer misaysay nga nagsugod ang pagkahugno sa pundasyon atol sa kusog nga ulan sa miaging adlaw. Nabantayan nga mouyog na ang tulay kon duna’y mga bug-at nga sakyanan nga moagi.

Si Konsehal Tumulak nga maoy nagdumala sa Local Disaster Risk-Reduction Management Council mipaalerto na sa mga opisyal sa Guadalupe ug Sapangdaku kon dunay kusog nga uwan.  (BANAT NEWS)