Bankers maalkanse kun may sikyu sa ATM

CEBU, Philippines - Supak ang Cebu Bankers Club ug ang Cebu City Police Office sa plano sa konseho nga mohimo og ordinansa nga himuong rekisito sa tanang bangko nga butangan og gwardiya ug cctv cameras ang mga automated teller machines niini.

Sumala pa sa presidente sa Cebu Bankers Club nga si Gino Gonzales dako kaayo ang magasto sa mga bangko kung magbutang sila og gwardiya ug pagmuntar og cctv camera sa matag ATM booths.

Dunay gibanabanang 700 ka ATM booths sa siyudad ug kung butangan kini og tulo ka gwardiya matag adlaw sa tulo ka shiftings milyones ang kinahanglan aron isweldo kanila, apan gamay ra og abot sa bangko nga nanag-iya sa mga ATM machines.

Makakwarta lang ang bangko sa ilang ATMs pinaagi sa inter-bank transactions o kung dunay mo-withdraw gamit ilang makina gikan sa laing bangko diin maka-charge sila og P11.

Samtang ang CCPO mirason dili pa matawag nga “immediate concern” ang pagbutang og mga gwardiya ug cctv cameras. Base usab sa record sa CCPO, unom lang ka kaso sa pagpanulis diha sa mga ATM booths ang natala gikan sa bulan sa Enero hangtud sa Agosto ning tuiga.

Samtang way bisan usa ka kaso nga nahitabo nga dunay ATM fraud dinhi sa siyudad sukad pa sa nakalabay nga tuig. Sa pagkakaron aduna nay gibutang nga dugang security measures ang matag bangko sa tanan nilang makina.

Si Konsehal Noel Eleuterio Wenceslao kinsa maoy misugyot sa maong ordinansahon miingon nga lingkuran una nila uban sa CBC ug kapolisan ang maong isyu.

Dugang ni Wenceslao nga posibleng mohangyo na lang sila sa kapolisan nga visible diha sa lugar diin dunay mga ATM machine. (BANAT NEWS)