Way footage sa LBC robbery

CEBU, Philippines – Ilaga ang gipasanginlan sa mga kawani sa LBC Branch sa Llamas Street, Punta Princesa, Cebu City nga nakaingon nga wala mi-andar ang tulo nila ka close circuit television (CCTV) atol sa pagtulis kanila kagahapon sa udto. Matud pa ni Senior Superintendent Noli Romana, director sa kapolisan sa siyudad nga ang IT “expert” mibutyag nga gikitkit sa ilaga ang wire sa ilang CCTV.

Dunay katupad nga kan-anan ug motorcycle accessories store ang LBC apan way nakamatikod nga dunay komosyon o tulis nga nahitabo sa sulod sa LBC. Base sa imbestigasyon, tulo ka mga tulisan ang giingong mitulis kanila , ang usa misulod, ang usa nagbantay sa gawas ug ang ikatulo nagpaabot sa ilang motorsiklo. Nakuha sa mga tulisan ang dili mominos P5,000.00,  ug dayon sibat sa maong lugar. Mao na kini ang ikaduhang higayon nga gitulis ang maong LBC branch, gitulis kini sa miaging Nobiyembre sa 2013 ug mao na ang ika-pitong higayon nga gitulis ang LBC dinhi sa Sugbo. - /EIM) (BANAT NEWS)