Nawong gilaplap
CEBU, Philippines – Gikuhaan sa duha ka mata, duha ka dalunggan, gilaslasan ang ilong, gi-abis ang dila ug gilangkat pa ang ubol-ubol sa usa ka habal habal drayber nga nakit-an sa kasagbutan nga bahin sa Sabang, Danao City, kagahapon sa alas 9:25 sa buntag.
Ang biktima naila nga si Cirilo Dayday, 31, lumad nga taga Lataban, Liloan.
Matud pa ni PO2 Ronald Gomez sa Danao Police nga nahinabi sa Banat News nga usa ka tawag ang ilang nadawat gikan sa usa ka concerned citizen nga nagpahibalo nga dunay usa ka tawo ang nakit-ang patay sa maong mingaw nga lugar.
Sumala pa ni Gomez nga usa ka Zacarias Quezon ang unang nakakita sa maong patay nga lawas human kini nangayam sa maong lugar ug iyang nakita ang maong patay nga lawas.
Matud ni Gomez nga posibleng gisakyan sa kriminal ang biktima ug pag-abot niini sa maong lugar gihimo ang krimen.
Pipila ka metros gikan sa lawas ni Dayday duna’y nakuha nga usa ka motorsiklo nga Honda Wave sa biktima.
Gisubay sa kapulisan kung wala ba kini nakabingkil sa nanglabay nga mga adlaw ug kung kinsa ang katapusang pasahero niini sa wala pa kini napalgang patay. - /EIM) (BANAT NEWS)
- Latest
