Tabunok vendors supak sa bag-ong merkado

CEBU, Philippines - Dili pabor ang mga manindahay sa Tabunok Public Market nga magtukod og bag-ong merkado ang kagamhanan sa dakbayan sa Talisay.

Kini ang gipahibawo sa pangulo sa kahugpungan sa mga manindahay nga si Sherwin Echavez kinsa mipadayag nga dili sila mamahawa sa karaang merkado ug ilang gusto nga usa lang ka andana ang tukuron sukwahi sa tulo nga giplano ni Mayor Johnny Delos Reyes.

Apan si Delos Reyes misumbalik nga mag-mayor una si Echavez aron ang iyang plano maoy sundon.

Gikataho nga karong Nobiyembre sugdan ang pagtukod sa bag-ong merkado sa Tabunok.

Ang konseho sa Talisay gipangulohan ni Bise Mayor Romeo Villarante gidala sa Naga City, Albay aron pakit-on sa ilang duha ka andanang merkado nga nahimong malampuson ug maayong pagkadumala.

Si Echavez mihimakak nga dunay sabot-sabot nga nahitabo tali nila ug sa mga opisyal sa dakbayan.

Niadtong Biyernes giingong nagtagbo ang mga lider sa manindahay ug nagkasabot nga dili sila mosugot nga magtukod ang siyudad sa tulo ka andana nga merkado. Ang mayor nakasaway sa pamahayag ni Echavez kinsa iyang gihulagway nga supak       sa kalamboan sa      Talisay.

Nagkanayon si Delos Reyes nga kon masugdan na ang bag-ong merkado ug magmagahi ang mga manindahay sa pagpahawa risgo na kini sa mga manindahay sanglit temporaryo lang ang ilang pagbalhin samtang tukuron ang bag-ong merkado. - /GMR) (BANAT NEWS)