Shootout usa patay

CEBU, Philippines - Patay ang usa ka gidudahang tulisan, samtang duha ka tawo ang naangol human sa nahitabong “shootout” tali sa grupo sa mga tulisan ug sa tag-iya sa usa sa mga gasolinahan diha sa Barangay Luray Dos sa dakbayan sa Toledo sa miaging Domingo sa gabii.

Gisusi pa karon sa kapolisan kun kinsa ang napatay nga tulisan, apan dunay nakuhang driver’s license gikan sa maong suspek nga nagbaton og pangalan nga “Evan Dagalan Bejec” nga taga 138D Gorordo Avenue, Barangay Kamputhaw sa dakbayan sa Sugbo.

Samtang gipangita pa sa kapolisan ang laing tulo ka kaubanan niini diin usa kanila babaye nga daling nangeskapo.

Naangol sa maong hitabo ang tag-iya sa gasolinahan nga si Raul Monsanto ug  pump boy niini nga si Wiljune Nacua, 20.

Sa imbestigasyon sa Toledo City Police Station nga miabot ang maong mga tulisan sakay sa motorsiklo ug nihunong duol sa cashiers booth sa Shell Gasoline Station dayong tion og kalibre .38 ug mideklarar og tulis.

Usa sa mga tulisan ang nimando sa kahero nga si Jose Cristitoto Tanoco, 35, nga ablihan ang pultahan sa cashiers booth, daling misulod ang usa sa mga tulisan ug gikuha ang P6 mil nga halin ug duha ka cellphone.

Dihang paingon nang mobiya ang mga tulisan,  ang usa sa mga pump boy nga si Aron Muares Perequin, 20, ang midagan paingon sa ilang agalon nga si Monsanto.

Apan namatikdan kini sa usa sa mga tulisan ug gipusil siya makaduha ka higayon apan ang naigo ang lain nga pump boy nga si Wiljune Nacua  diha sa tuo nga paa.

Daling migawas si Monsanto dala ang iyang armas ug gipusil ang suspek nga sakay sa usa ka Suzuki Raider motorcycle nga adunay temporary plate number 2415 XO kinsa giingong nakigpinusilay usab kang Monsanto.

Naigo sa luyo nga bahin sa ulo ang tulisan hinungdan sa hinanali niining kamatayon samtang samdan usab si Monsanto sa wala nga tuhod.

Daling gidala sa Toledo City Hospital si Monsanto ug Nacua. Gituohan nga dunay usa sa mga tulisan nga nasamdan apan nakaeskapo.

Nakuha sa crime scene ang motorsiklo sa tulisan, 13 ka kabhang sa .9mm, usa ka .38 caliber revolver nga adunay unom ka bala, usa ka itom nga pitaka nga dunay lisensiya nga nakapangalan kang “Evan Dagalan Bejec.”

Ang grupo mao usab ang mitulis gihapon sa Platinum Gasoline Station dili layo sa nahitaboan ug nakuha ang gibana-bana nga P7 mil nga kita.

Matud pa sa kahero sa Platinum Gasoline Station nga si RJ Maki,  niabot ang mga tulisan ug yanong miduol ug misulod sa cashier's booth dayon mitulis kanila.

Sa pakighinabi kang Chief Inspector Michael Anthony Bastes, hepe sa Toledo City Police Station nga ilahang gisusi karon ang impormasyon nga ang napatay mao si Randy Jakosalem.

Si Senior Superintendent Noel Gillamac ang hepe sa Cebu Provincial Police Office mibutyag nga ang maong mga tulisan grupo sa mga kanhi guwardiya.

Gikasagmuyo hinuon ni Gillamac nga daw wala’y mga gamit ang mga guwardiya sa mga gasolinahan tungod kay ang uban kanila madis-armahan pa gani sa mga tulisan. - /EIM) (BANAT NEWS)