Way dautan sa utang kun… Estorya ug hulagway gikan

CEBU, Philippines- Pagsalig sa Kahitas-an ug pailob maoy yawe sa kalamposan.” Mao kini ang sekreto ni Julian Abrera kong nganong gikan sa ginagmay nga baligya’ng hotcake nakahuman sa pagtungha ang upat niya ka anak ug nakapundar sila og nindot nga balay.

Si Julian kinsa mas naila sa tawag nga “Tatay Jul” kauban ang iyang asawa nga mas naila usab nga “Nanay Chona” diha sa ilang komunidad nagsugod og paninda sa publikong tindahan sa Sibonga mga lapas 20 na ka tuig ang nilabay.

Human nga nabungkag ang kompanya nga gitrabahoan ni Tatay Jul isip usa ka seaman ug ang sobra na ka estrikto ug upgrading karon sa mga buot manarbaho sa barko, nawad-an na siya niadto og trabaho.

Matud ni Tatay Jul nga minyo na siya atong panahona busa iya gyud gisiguro nga makapangita siya og panginabuhian alang sa iyang pamilya ug anak nga si Joan kinsa linghod pang edad adtung tungura.

Busa ni loan siya sa Social Security System og P3,000 aron mao ang iyang gipuhonan.

Nagsugod sila sa iyang asawa og tinda og hotcake ug gamay nga sari-sari store sa merkado sa Sibonga.

Katabang ang iyang tibuok pamilya, ilang gisuroy sulod sa merkado ang ilang tinda nga hotcake ug mango juice.

Apan sa paglabay sa mga katuigan, sa tan-aw ni Tatay ug Nanay, di paigo alang kanila ang kita sa hotcake ug mango juice busa mihangyo siya sa mga Intsik nga supplier nga kong mahimo makautang sila og igbabaligya sa ilang gamay nga sari-sari store.

Kapila sila gibalibaran apan bisan pa man niini wala sila nihunong og hangyo dungan ang pag-ampo sa Kahitas-an nga unta dunay mopahuwam kanila og puhonan ug mosalig sa ilang duha.

Gidungog usab hinuon ang ilang pag-ampo, dunay laing supplier nga misugot sa ilang hangyo ug mipautang kanila og puhonan.

Nahimong utang-bayad ang tuyok sa ilang negosyo, mopaginansya lang sila og gamay sa mga items nga ilang ibaligya ug ibalik ang capital ngadto sa ilang giutangan.

Hangtod naabot ang panahon tungod sa ilang wala’y hunong nga debosyon sa Kahitas-an hinay-hinay nga niasenso ang ilang gamay nga negosyo.

Aron usab mas mapalambo pa ang ilang gamay nga negosyo mi-loan sila sa usa ka lending firm aron makapalit og sakyanan nga himuong kargahanan og mga utanon ug prutas gikan sa mga umahan sa bukid sa Sibonga aron ihatud sa Carbon Public Market nga ilaha usab nakwartahan.

Bisan pa man sa ilang ka busy sa ilang negosyo apan wala nila hikalimte paghatag og oras ang Ginoo. Mogahin sila og oras sa simbahan apil na ang ilang kinitaan, ila gayud apilan ang Ginoo.

Matud ni Tatay Jul nga apil sa pagnegosyo ang mga utang. Matud niya di man bati ang utang tungod kay dinhi usab sila gasugod. Apan matud niya nga aduna g’yu’y uban nga sobra na kaayo mangutang apan lisod na makabayad.

Giangkon hinuon niya nga nag-agi usab og mga pagsuway ang ilang negosyo tungod kay dunay daghang nangutang kanila nga wala na makabayad.

Gipautang sila tungod kay mibati usab sila kanila sama sa ilang giagian sa pagsugod sa ilang negosyo kaniadto, apan duna g’yuy uban nga gahi mamayad ug duna pay mga hitabo nga impason lang sa away.

Tungod sa maong kasinatian, nakadesider sila nga limitahan na ang mga tawo nga ilang pa-utangon, kadto lang g’yung nagkinahanglan nga duna say kapasidad nga makabayad.

Sumala pa ni Tatay Jul, kung di kini nila buhaton maglisod na sila pagtuyok sa ilang puhonan.

Bisan pa man sa taas nga kompetisyon sulod sa merkado apan nagpabilin silang lig-on sa pagsalig sa Ginoo nga di sila niini talikdan.

Nahimong sulondon ang ilang kinabuhi. Nakapahuman sila og pa eskwela sa ilang upat ka anak sa mga dagkong unibersidad sa Sugbo.

Mensahe ni Tatay Jul ug Nanay Chona alang sa mga nagsugod pa lang og negosyo, “Isalig ang tanan sa Ginoo tungod kay care taker lang kita sa tanang panalangin nga atong nadawat.

Ikaduha, pasensya ug pa-ilob lang aron hingpit nga matuman ang mga gidamgo.”

Karong aduna na sila’y nindot ug desenteng panimalay, ang iya usab upat ka mga anak nga sila Jo Anne, Warren James, Diana Jean ug Christine nakabaton na usab og kaugalingon nilang mga pamilya. - /EIM) (BANAT NEWS)