Koreano nanumbag sa bar gidakop

CEBU, Philippines- Usa ka hubog nga Koreano ang gidakop sa kapolisan sa Fuente Police Station human gireklamo nga nanumbag sa usa ka babaye sulod sa usa ka bar sa Mango Square, Sabado sa kadlawon.

Si Donghoon Mo, 22, unang gidakop sa bouncer nga si Gebver Ed Paul Amores sa bar sa Mango Square human iyang gisumbag sa nawong ang usa ka Jieralyn Alcontin, 27, taga lungsod sa Aloguinsan.

Sa inisyal nga imbestigasyon nasayran nga samtang naglingkod ang babaye sa usa ka lamesa, kalit lang miduol ang langyaw ug mihangyo nga molingkod apan nabanyatan nga hubog na kini.

Human sa pipila ka minutos, sa wala’y igong hinungdan kalit lang nasuko ang langyaw ug misangpot sa panaglalis.

Wala matagbaw ang Koreano gisumbag ang babaye sa nawong hinungdan nga nagpatabang sa bouncer.

Si Amores ang dali usab mitawag sa mobile patrol nga naka-standby sa maong lugar ug gitugyan ang langyaw ug gihatud sa Fuente Police Station.

Ang hepe sa Fuente Police Station, Chief Insp. Wildemar Tiu, nagkanayon nga sa wala pa nahitabo ang pagpanumbag, gikaon sa langyaw ang pagkaon sa babaye ug giinom usab ang ilimnon.

Matud ni Tiu nga nasuko ang babaye human giingnan sa langyaw nga ang mga Pilipina gusto lang og kuwarta.

Kagahapon gikatakda nga mouli sa Korea ang langyaw nga pwerteng pangayo og pasaylo sa iyang gibuhat apan ang hepe sa Fuente Police mipasabot nga kinahanglan nga tudloan og leksiyon ang mga langyaw nga may susama og batasan. Kasong physical injuries ug paglapas sa ordinansa batok sa paghubog-hubog ang atubangon sa maong langyaw. - /GMR) (BANAT NEWS)