Way sakop sa isis sa rehiyon-7
CEBU, Philippines - Gihimakak sa National Commission on Muslim Filipinos nga duna’y pagpang-recruit sa mga Muslim Filipinos sa Kabisay-an nga mamahimong sakop sa Islamic State of Iraq and Syria (ISIS).
Matud ni Alexander Minalang, officer-in-charge sa NCMF nga pinaagi sa hugot nga pagbantay sa kapolisan inabagan sa tabang sa Muslim communities, gihimo ang tanan aron magpabilin nga malinawon ang tibuok Kabisay-an.
Ang kapolisan sa Rehiyon 7 nag-monitor karon sa mga batan-ong Muslim human gibutyag ni kanhi Presidente Fidel V. Ramos ang giingong usa ka gatos ka mga Muslim Filipinos ang mobiya sa nasud ug magpasakop sa ISIS.
Gisalikway ni Minalang ang unang report nga matud pa nga kadtong nadakpan sa dakbayan sa Lapu-Lapu City nga Jihadist preacher nga si Robert Cerantonio Musa nakapang-recruit na aron mahimong sakop sa ISIS.
Gipasalig sa NCMF nga wala’y angay kabalak-an ug kahadlukan tungod kay ilang gihimo ang tanan aron magpadayon nga malinawon ang rehiyon.
Nasayran nga daku ang pagsalig sa kapolisan sa Muslim community sa Sugbo nga mohatag og kasayuran labot niini. (/GMR)(BANAT NEWS)
- Latest
