Gianod nga bata, patay na
CEBU, Philippines - Nakaplagan apan wala nay kinabuhi nga naglutaw sa dagat ang 15-anyos nga tinun-an nga na-missing human naanod samtang naligo sa bukana sa Guadalupe River sa Barangay Pasil niadtong miaging adlaw kauban ang iyang mga barkada.
Matud pa ni SPO1 Victor Ayuman sa Homicide Section sa Cebu City Police Office nga nahinabi sa Banat News nga usa ka mananagat ang nakakita sa patay’ng lawas ni Rowen Culala Abellaneda, tinun-an sa 4th year sa Gothong National High School ug nagpuyo sa 248 C. Padilla Street, Sawang Calero, Cebu City.
Ang City Disaster Risk Reduction Management Council milusad dayon og search and rescue operation apan wala na kini igkita. Ang rescue team sa Pasil nipadayon sa pagpangita sa bata hangtud nga gisangpit sila sa maong mananagat.
Sila si Victor Taneo, Victor Bacalso, Tany Taneo ug George Torreon mihaw-as sa lawas ni Abellaneda.
Gituohang wa magdahom ang mga bata nga dunay moawas nga tubig baha gikan sa kabukiran tungod kay una mang nagbunok ang uwan sa bukid una pa nagbunok sa siyudad hinungdan nga nakuratan sila pag-abot niini. (/EIM)(BANAT NEWS)
- Latest
